1/6:āṅ maryādābhividhyoḥ iti vaktavyam |
2/6:iha api yathā syāt ākumāram yaśaḥ pāṇineḥ iti |
3/6:tat tarhi vaktavyam |
4/6:na vaktavyam |
5/6:maryādāvacane iti eva siddham |
6/6:eṣā asya yaśasaḥ maryādā |

āṅityeṣā śabdo maryādāvacane karmapravacanīyasaṃjño bhavati. avadhirmaryādā. vacanagrahaṇādabhividhirapi gṛhyate. ā pāṭaliputrād vṛṣṭo devaḥ. ā kumāraṃ yaśaḥ pāṇineḥ. ā sāṃkāśyāt. ā mathurāyāḥ. maryādāvacane iti kim? īṣadarthe kriyāyoge ca mā bhūt.

lakṣanaitthaṃbhūtā'khyānabhāgavīpsāsu pratiparyanavaḥ 1.4.90 lakṣaṇe, itthaṃbhūtā'khyāne, bhāge, vīpsāyāṃ ca viśāyabhūtāyāṃ prati pari anu ityete karmapravacanīyasaṃjñā bhavanti. lakṣaṇe tāvat vṛkṣaṃ prati vidyotate vidyut. vṛkṣaṃ pari. vṛkṣam anu. itthaṃbhūtā'khyāne sādhur devadatto mātaram prati. mātaram pari. mātaram anu. bhāge yadatra māṃ prati syāt. mām pari syāt. māmanu syāt. vīpsāyām vṛkṣaṃ vṛkṣam prati siñcati. pari siñcati. anu siñcati. lakṣaṇādiṣu iti kim? odanaṃ pariṣiñcati. atha pariśabdayoge pañcamī kasmān na bhavati pañcamyapāṅparibhiḥ 2.3.10 iti? varjanaviṣāye sā vidhīyate, apaśabdasāhacaryāt.

lakṣaṇetthambhūtākhyānabhāgavīpsāsu pratiparyanavaḥ , 1.4.89 lakṣaṇaṃ jñāpako hetuścihnamihābhipretam. lakṣyate cihnyate yena tallakṣaṇam. kañcitprakāramāpannamitthambhūtam, tasyākhyānamitthambhūtākhyānam. "bhī prāptau" (dhā.pā.1844) ātmanepadī. tasmāt "ā dhṛṣādvā" (dhā.pā.1805 taḥ paścāt) iti vibhāṣitaṇico yadā curādiṇij nāsti, tadā ktāntasya bhūta iti rūpaṃ bhavati. svīkriyamāṇoṃ'śo bhāgaḥ. yastvasvīkriyamāṇe'śe bhāgaśabdaḥ prayujyate-- priyaṅgorbhāgo nagarasya bhāga iti, sa svīkriyamāṇāṃśasādṛśyāt. padārthān vyāptumicchā vīpsā. ete ca lakṣaṇādayaḥ pratyādīnāṃ na dyotyāḥ. kiṃ tarhi? viṣayabhūtāḥ, ata evāha-- "viṣayabhūtāyam" iti. etacca "abhidheyavalliṅgavacanāni bhavanti" (vyā.pa.73) iti liṅgavipariṇāmaṃ kṛtvā lakṣaṇādibhiḥ sambadhyate. etacca "abhidheyavalliṅgavacanāni bhavanti" (vyā.pa.73) iti liṅgavipariṇāmaṃ kṛtvā lakṣaṇādibhiḥ sambadhyate. yadi lakṣamādayaḥ pratyādīnāṃ na dyotyāḥ, tarhi kiṃ te dyotayanti? sambandhaviśeṣam. "vṛkṣaṃ prati vidyotate vidyut" iti. atra vṛkṣo lakṣaṇam, vidyotamānā vidyullakṣyā; sā hi vṛkṣaṃ prāpya vidyotata iti tayoḥ prāptikriyājanito'tra lakṣyalakṣaṇabhāvaḥ sambandhaḥ pratiśabdena dyotyate. "sādhurdevadatto mātaraṃ prati" iti. pratinā devadattasya mātṛviṣayā sādhubhāvāpattirākhyāyate. atrāpi mātaraṃ prāpya sādhubhāvāpattiriti prāptikriyājanita eva mātuḥ sādhubhāvāpatteśca viṣayaviṣayibhāvalakṣaṇaḥ sambandhaḥ pratinā'‌'khyāyate. "yadatra māmityādi. yo bhāgo māmabhibhajate sa dīyatāmityarthaḥ. atrāpi vibhajanakriyājanitaḥ svīkārakriyājanito vā svasvāmibhāvaḥ sambandhaḥ. "mām" iti. asmacchabdasya "tvamāvekavacane" 7.2.97 iti mādeśaḥ. "dvitīyāyāñca" 7.2.87 ittyāttvam. "vṛkṣaṃ vṛkṣaṃ prati siñcati" iti. atra vīpsā dvirvacanenaiva dyotyate. pratiśabdasya tu sekakriyājanito vṛkṣāyāṃ yaḥ sambandhaḥ sādhyasādhanabhāvalakṣaṇaḥ sa eva dyotyaḥ. vṛkṣādinimittaṃ sādhanam, sekaḥ sādhyaḥ. dvitīyā ceha sakarmakatvāt siceḥ sekena vyāptumiṣṭatamānāṃ vṛkṣāṇāṃ karmatve sati "karmaṇi dvitīyā" 2.3.2 ityanenaiva siddhā. karmapravacanīyasaṃjñayopasarjanasaṃjñayā nivarttitattvāt "upasargāt sunoti" 8.3.65 ityādinā dhatvaṃ na bhavati. "pariṣiñcati" iti. sarvataḥ siñcatītyarthaḥ. athetyādi codyam. varjanetyādi parīhāraḥ. apaśabdasāhacaryādityatatrraivopapattiḥ. tatra hi karmapravacanīyādhikārādvarjanārthasyāpaśabdasya grahaṇaṃ varjana eva. tasya "apaparī varjane" 1.4.87 iti karmapravacanīyasaṃjñā vihitā. tasmāttena sāhacaryādvarjanārthasya parogrrahaṇam. atastenāpi yoge varjana eva viṣaya iyaṃ pañcamī vidhīyate, na lakṣaṇādiṣu॥

āṅmaryādāvacane. uktasaṃjña iti. karmapravacanīyasaṃjñaka ityarthaḥ. nanu `āṅmaryādāyāmi'tyeva siddhe vacanagrahaṇaṃ vyarthamityata āha–vacanagrahaṇāditi. tena vineti maryādā. tena sahetyabhividhiḥ. maryādāśabdo yatrocyate tanmaryādāvacanam=`āṅmaryādābhividhyoḥ' iti sūtram. tatra ya āṅ dṛṣṭaḥ sa karmapravacanīyasaṃjñakaḥ syādityarthaḥ. tathāca maryādibhividhyorāṅ karmapravacanīya iti phalatīti bhāvaḥ.

lakṣaṇetthambhūtākhyānabhāgavīpsāsu pratiparyanavaḥ 544, 1.4.89 lakṣaṇetthaṃbhūta. lakṣaṇaṃ jñāpakam. ayaṃ prakāra itthaṃ, taṃ prāpta itthambhūtaḥ tasyākhyānamupapādakamitthambhūtākhyānam. bhāgaḥ svīkāryo'śastatsvāmī vivakṣitaḥ. vyāptuṃ kārtsnyena saṃbanddhumicchā vīpsā. lakṣaṇaṃ ca itthambhūtākhyānaṃ bhāgaśca vīpsā ceti dvandvādviṣayasaptamī. tadāha-eṣviti. eṣvartheṣu dyotyeṣviti tu nāśritam. vyāptumicchāyāstaddyotyārthatvā'bhāvāditi bhāvaḥ. lakṣaṇe iti. "udāharaṇaṃ vakṣyate" iti śeṣaḥ. vṛkṣaṃ pratīti. lakṣyalakṣaṇabhāvasaṃbandho dvitīyārthaḥ. sa ca pratyādidyotyaḥ. vṛkṣeṇa lakṣyamāṇā vidyudvidyotate ityarthaḥ. utpannavinaṣṭā vidyut, tadutpādito vṛkṣaprakāśo'pi utpannavinaṣṭa eva. tathāca vṛkṣaprakāśottaraṃ vidyuto'sattvena pratyakṣā'bhāvādanumeyā sā. tataśca prakāśitena vṛkṣema vidyujjñānādvṛkṣo lakṣaṇam. itthambhūtākhyāta iti. "udāharaṇaṃ vakṣyate" iti śeṣaḥ. bhakto viṣṇuṃ pratīti. "bhaja sevāyām". bhaktirastyasyeti bhaktaḥ, matvarthīyo'rśāadyac, viṣayatāsaṃbandhaḥ pratyādidyotyo dvitāyārthaḥ , tasya bhaktāvekadeśe'nvayaḥ. viṣṇuviṣayakabhaktimānityarthaḥ. atra bhakto bhaktirūpaṃ prakāraviśeṣaṃ prāptatvāditthambhūtastasya viṣṇuviṣayakatayā upapādyatvādviṣayatāsaṃbandhastadupapādakaḥ pratidyotya iti jñeyam. bhāge iti. "udāharaṇaṃ vakṣyate" iti śeṣaḥ. lakṣmīrhariṃ pratīti. svāmityaṃ dvitīyārthaḥ. pratyādidyotyaḥ. tadāha--harerbhāga ityartha iti. hareḥ svabhūteti yāvat. vīpsāyāmiti. "udāharaṇaṃ vakṣyate" iti śeṣaḥ. vṛkṣaṃ vṛkṣaṃ pratīti. "nityavīpsayo"riti dvirvacanam. atra sanvācyā icchā svarūpasatī vyāptireva tu vivakṣitā, sā ca kārtsnyena saṃbandhātmikā. tathāca prakṛtyarthagatakārtsnyameva vyāptiḥ, sā yadyapi dvirvacanadyotyā, tathāpi pratiparyanuyoge taddyotyatvamapi. tathāca kṛtsnaṃ vṛkṣaṃ siñcatītyarthaḥ. vyaktikārtsnyamiha vivakṣitaṃ natvavayavakārtsnyamiti "nityavīpsayo"rityatra bhāṣye spaṣṭam. nanu secane vṛkṣasya karmatvādeva dvitīyāsiddheḥ kimiha karmapravacanīyasaṃjñayetyata āha--atreti. gatyupasargasaṃjñāpavādaḥ karmapravacanīyasaṃjñetyuktamato'tra prateḥ kramapravacanīyasaṃjñayā upasargasaṃjñāyā bādhāt "upasargātsunotī"ti ṣatvaṃ na bhavati. karmapravacanīyatvā'bhāve tu praterupasargatvāttataḥ parasya siñcateḥ sasya ṣatvaṃ syādityarthaḥ. bhāṣye tu "kimarthamidamucyate, karmatvādeva dvitīyā sidhyati,upasargasaṃjñānivṛttistu na prayojanam. kriyāyogā'bhāve tadaprasakte"rityākṣipya "dvitīyārthamevaitat karmapravacanīyasaṃjñāvidhāna"mityaktam. vṛkṣasya secane karmatve'pi tadavivakṣāyāṃ ṣaṣṭhīṃ bādhitumidaṃ karmapravacanīyatvāvidhānam. kiṃ ca vṛkṣasya secane karmatve'pi prathamataḥ pratidyotyasaṃbandhe'nvayena antaraṅgatvāttannimittaṣaṣṭhībādhanārthamidam. "vṛkṣaṃ vṛkṣaṃ prati pakṣiṇa āsate" ityādāvakarmakadhātuyoge'dhikaraṇādisaṃjñānirasārthaṃ cedamiti bhāṣyāśaya iti śabdenduśekhare mañjūṣāyāṃ ca spaṣṭam. eṣu kimiti. "lakṣaṇetthambhūtākhyānabhāgavīpsāsu" iti kimarthamityarthaḥ. pariṣiñcatīti. "agni"mityādi śeṣaḥ. atra lakṣaṇādyabhāvātkarmapravacanīyatvā'bhāve"upasargātsunotī"ti ṣatvamiti bhāvaḥ.

lakṣaṇetthambhūtākhyānabhāgavīpsāsu pratiparyanavaḥ 488, 1.4.89 lakṣaṇetthaṃ. vṛkṣaṃ pratīti. vṛkṣasaṃbandhi dyotanamarthaḥ. saṃbandhaśca lakṣyalakṣaṇabhāva iti pratyādayo dyotayanti. bhakto viṣṇuṃ pratīti. viṣṇorbhakteśca viṣayaviṣayibhāvaḥ pratyādidyotyaḥ. bhaktaḥ kiṃcit prakāraṃ prāpta ityarthaḥ. lakṣmīrhariṃ pratīti. lakṣmīrūpasya bhāgasya hariṇā saha svasvāmibhāvaḥ [saṃbandhaḥ]. vṛkṣaṃ vṛkṣamiti. iha vūpsā dvirvacanenaiva dyotyate. pratyādiśabdastu kriyayā saṃbadhyate. karmaṇyeva dvitīya. kramapravacanīyasaṃjñayā upasargasaṃjñāyā bādhāt ṣatvaṃ na, etadarthameva "lakṣaṇādayo viṣayaṭa tayopāttā"iti vyākhyātamākare. "pañcamyapāṅparibhiḥ"iti tu na bhavati, varjanārthenā'petyanena sāhacaryāt. pariṣiñcatīti. sarvataḥ siñcatīttarthaḥ. "upasargātsunotī"ti ṣatvam.