1/53:paraḥ sannikarṣaḥ samhitā cet adrutāyām asaṃhitam | paraḥ sannikarṣaḥ saṃhitā cet adrutāyām vṛttau saṃhitāsañjñā na prāpnoti |*
2/53:drutāyām eva hi paraḥ sannikarṣo varṇānām na adrutāyām |
3/53:tulyaḥ samnikarṣaḥ |*
4/53:tulyaḥ samnikarṣaḥ varṇānām drutamadhyamavilimbitāsu vṛttiṣu |
5/53:kiṅkṛtaḥ tarthi viśeṣaḥ |
6/53:varṇakālabhūyastvam tu | varṇānām tu kālabhūyastvam |*
7/53:tat yathā |
8/53:hastimaśakayoḥ tulyaḥ sannikarṣaḥ prāṇibhūyastvam tu |
9/53:yadi evam drutāyām taparakaraṇe madhyamavilimbitayoḥ upasaṅkhyānam kālabhedāt |*
10/53:drutāyām taparakaraṇe madhyamavilimbitayoḥ upasaṅkhyānam kartavyam |
11/53:kim kāraṇam |
12/53:kālabhedāt |
13/53:ye drutāyām vṛttau varṇāḥ tribhāgādhikāḥ te madhyamāyām ye madhyamāyām vṛttau varṇāḥ tribhāgādhikāste vilimbitāyām |
14/53:uktam vā |*
15/53:kim uktam |
16/53:siddham tu avasthitāḥ varṇāḥ vaktuḥ cirāciravacanāt vṛttayaḥ viśiṣyante iti |
17/53:atha vā śabdāvirāmaḥ saṃhitā iti etat lakṣaṇam kariṣyate |
18/53:śabdāvirāme prativarṇam avasānam |*
19/53:śabdāvirāme prativarṇam avasānasañjñā prāpnoti |
20/53:kim idam prativarṇam iti |
21/53:varṇam varṇam prati prativarṇam |
22/53:yena eva yatnena ekaḥ varṇaḥ uccyāryate vicchinne varṇe upasaṃhṛtya tam anyam upādāya dvitīyaḥ prayujyate tathā tṛtīyaḥ tathā caturthaḥ |
23/53:evam tarhi anavakāśā saṃhitāsañjñā avasānasañjñām bādhiṣyate |
24/53:atha vā avasānasañjñāyām prakarṣagatiḥ vijñāsyate : sādhīyaḥ yaḥ virāmaḥ iti |
25/53:kaḥ ca sādhīyaḥ |
26/53:yaḥ śabdārthayoḥ virāmaḥ |
27/53:atha vā hrādāvirāmaḥ saṃhā iti etat lakṣaṇam kariṣyate |
28/53:hrādāvirāme sparśāghoṣasaṃyoge asannidhānāt asaṃhitam |*
29/53:hrādāvirāme sparśānām aghoṣāṇām saṃyoge asamnidhānāt saṃhitāsañjñā na prāpnoti |
30/53:kukkuṭaḥ pippakā pittam iti |
31/53:kim ucyate saṃyoge iti |
32/53:atha yatra ekaḥ pacati iti ekaḥ pūrvaparayoḥ hrādena pracchādyate |
33/53:tad yathā |
34/53:dvayoḥ raktayoḥ vastrayoḥ madhye śuklam vastram tadguṇam upalabhyate |
35/53:badarapiṭake riktakaḥ lohakaṃsaḥ tadguṇaḥ upalabhyate |
36/53:ekena tulyaḥ sannidhiḥ |*
37/53:yathā ekaḥ varṇaḥ hrādena pracchādyate evam anekaḥ api |
38/53:atha vā paurvāparyam akālavyapetam saṃhitā iti etat lakṣaṇam kariṣyate| paurvāparyam akālavyapetam saṃhitā cet pūrvāparābhāvāt asaṃhitam | paurvāparyam akālavyapetam saṃhitā cet pūrvāparābhāvāt saṃhitāsañjñā na prāpnoti |*
39/53:na hi varṇānām paurvāparyam asti |
40/53:kim kāraṇam |
41/53:ekaikavarṇavartitvāt vācaḥ uccaritapradhvaṃsitvāt ca varṇānām |*
42/53:ekaikavarṇavartinī vāk |
43/53:na dvau yugapat uccārayati |
44/53:gauḥ iti yāvat gakāre vāk vartate na aukāre na visarjanīye |
45/53:yāvat aukāre na gakāre na visarjanīye |
46/53:yāvat visarjanīye na gakāre na aukāre |
47/53:uccaritapradhvaṃsitvāt |
48/53:uccaritapradhvaṃsinaḥ khalu api varṇāḥ |
49/53:uccaritaḥ pradhvastaḥ |
50/53:atha aparaḥ prayujyate |
51/53:na varṇaḥ varṇasya sahāyaḥ |
52/53:evam tarhi buddhau kṛtvā sarvāḥ ceṣṭhāḥ kartā dhīraḥ tatvannītiḥ śabdena arthān vācyān dṛṣṭvā buddhau kuryāt paurvāparyam | buddhiviṣayam eva śabdānām paurvāparyam |*
53/53:iha yaḥ eṣaḥ manuṣyaḥ prekṣāpūrvakārī bhavati saḥ paśyati asamin arthe ayam śabdaḥ prayoktvayaḥ smin tāvat śabde ayam tāvat varṇaḥ tataḥ ayam tataḥ ayam iti |

paraśabdo 'tiśaye vartate. saṃnikarṣaḥ pratyāsattiḥ. paro yaḥ sannikarṣaḥ, varṇānām ardhamātrākālavyavadhānaṃ, sa saṃhitāsaṃjño bhavati. dadhyatra. madhvatra. saṃhitāpradeśāḥ siṃhitāyām ( 6-1-72 ) ityevam ādayaḥ.

virāmo 'vasānam 1.4.110 viratiḥ virāmaḥ. viramyate 'nena iti vā virāmaḥ. so 'vasānasaṃjño bhavati. dadhiṃ. madhuṃ. vṛkṣaḥ. plakṣaḥ. avasānapradeśāḥ kharavasānayor visarjanīyaḥ 8.3.15 ityevam ādayaḥ. iti śrījayādityaviracitāyāṃ kāśikāyāṃ vṛttau prathamādhyāyasya caturthaḥ pādaḥ. dvittiyo 'dhyayaḥ prathamaḥ pādaḥ

virāmo'vasānam. , 1.4.109 "viratirvirāmaḥ" iti. bhāve ghañ. virāmo vaṇoccāraṇābhāvo'vasānasaṃjño bhavati. "viramyate'neneti virāmaḥ" iti virāmaśabdasya dvitīyamarthaṃ darśayati. "kṛtyalyuṭo bahulam" 3.3.13 iti bahulavacanādasaṃjñāyāmapi "halaśca" 3.3.121 iti ghañ. atra pakṣe yenāntyena varṇena viramyate so'vasānasaṃjño bhavati. tatra pūrvasmin pakṣe'bhāve paurvāparyābhāvāt "kharavasānayoḥ" 8.3.15 ityatrāvasānāpekṣayā viṣayasaptamīyaṃ vijñāyate; na parasamaptamī. kharapekṣayā tu saptamīyam. anye tu-- yadyabhāve paurvāparyaṃ na sambhavatītyavasanāpekṣayā "kharavasānayoḥ" 8.3.15 iti parasaptamī nopapadyate, tadā "iko yaṇaci" 6.1.74 ityādāvapi parasaptamī nopapadyate. katham? varṇānāṃ kramabhāvitvāt, uccaritapradhvaṃsitatvācca. yadegasti tadāñ nāsti, yadā tvajasti tadeg nāsti. athātra buddhiprakalpitaṃ paurvāparyamāśritya parasaptamīṣyate, tadā "kharavasānayoḥ" 8.3.15 ityatrāpitathaivaiṣṭavyeti manyamānā avasānāpekṣayāpi parasaptamīmicchanti. apare tu--antyasya tu varṇasyāvasānasaṃjñāyāṃ satyāṃ "kharavasānayoḥ" 8.3.15 iti ṣaṣṭhī vijñāyate. atrāvasānāpakṣayā sthānaṣaṣṭhī. rephasyāvasānasya visarjanīya iti kharapekṣayā tavānantaryalakṣaṇā ṣaṣṭhīti vadanti. tanmate sthānaṣaṣṭha()āṃ hi "ro ri" 8.3.14 ityato rephasyānuvṛttasya yat sthānitvaṃ tadavirudhyate tadevamekāpi vibhaktiryathāyogaṃ vibhajyate. nanu cābhāvapakṣe'pi pūrvasminnapi bhāge'nuccāramamasti, tatrāpi visarjanīyaḥ prāpnoti-- ratha iti, asti hratrāpi rephāt prāguccāraṇam? naiṣa doṣaḥ tatra hi prakṛtaṃ padagrahaṇaṃ repheṇa viśiṣyate-- rephāntasya padasyeti. na ca pūrveṇa repheṇa padaṃ bhavati. nanvevapyarthasyaiṣā saṃjñā syāditi "kharavasanāyoḥ" 8.3.15 ityatra "tasminniti nirdiṣṭe pūrvasya" 1.1.65 iti paribhāṣā nopatiṣṭhate. śabde hi saptamīnirdiṣṭe satīyamupatiṣṭhate, nārthe. tadanupasthāne ca pareṇa repheṇa rephāntasya ratha ityetasya padasya pūrvo yo rephastasya vyavahitasyāpi visarjanīyaḥ syāt, naiṣa doṣaḥ; jñāpakānna bhaviṣyati, yadayaṃ "uraṇ raparaḥ" 1.1.50 iti vyavahitasya rephasya visarjanīyamakṛtvā nirdeśaṃ karoti, tajjñāpayati- vyavahitasya rephasya visarjanīyo na bhavatīti. "nanvatra loke prasiddherevāyantye varṇe'vasānaśabdasya sampratyayo bhaviṣyati. prasiddho hi loke--antye varṇe'vasyateḥ prayogaḥ. tathā hi kenāvasyatītyukte vaktāro vadanti-- ikāreṇokāreṇa veti. ikārādivarṇenāvasānaṃ karotītyarthaḥ. tataḥ pradeśa evāvasānagrahaṇaṃ katrtavyamiti nārthaḥ saṃjñāsaṃjñipraṇanena, naitadasti; apūrvo hi syatiḥ parisamāptāvapi vatrtate-- avasito vāda iti, avagame'pi vatrtate-- avasito'rtha iti, parābhave'pi vatrtate--dvayorvivāde'vasito davadatta iti. tatra yadīyaṃ nārabhyate, tadāvasānagraṇe sandehaḥ syāt-- kimabhidhānāvasānaśabdasya grahaṇamiti? "virāmo'vasānam" (1.4.110) iti tu hrantagrahaṇaṃ katrtavyam-- kharantyayoriti? etadapi nāsti; evaṃ hi sandehaḥ syāt-- kimantyasya varṇasya? uta padasya? āhosvadvākyasyeti? tatrāntyasya viśeṣaṇārthaṃ varṇagrahaṇaṃ katrtavyaṃ syāt. tasmāt saṃjñāsaṃjñisambandhaḥ katrtavyaḥ. "vṛkṣaḥ, plakṣaḥ" iti. "kharavasanāyorvisarjanīyaḥ" 8.3.15. "dadhiṃ madhum̐" iti. "aṇo'pragṛhrasyānunāsika" 8.4.56 iti. atra hi "vā'vasāne"8.4.55 ityato'vasānagrahaṇamanuvartate॥ iti śrībodhisattvadeśīyācāryajinendrabuddhipādaviracitāyāṃ kāśikāvivaraṇapañjikāyāṃ prathamādhyāyasya caturthaḥ pādaḥ samāptaścāyaṃ prathamo'dhyāyaḥ॥ ----------- śrībodhisattvadaśīyācāryajinendrabuddhipādaviracitā nyāsāparaparyāyā kāśikāvyākhyā ---------- dvitīyādhyāyasya prathamaḥ pādaḥ

paraḥ saṃnikarṣaḥ. paraḥ=atiśayitaḥ. `dūrānātmottamāḥ parāḥ' ityamaraḥ. sannikarṣaḥ=sāmīpyam. ardhamātrādhikakālavyavadhānā'bhāvaḥ. ardhamātrākālavyavadhānasyā'varjanīyatvāt. tadetadabhipretyāha-atiśayita ityādinā.

virāmo'vasānam 29, 1.4.109 virāmo'vasānam. viramyate asminniti virāmaḥ. sāmīpike'dhikaraṇe ghañ. viramaṇaṃ-kriyāyā abhāvaḥ, sa ca śabdaśāstraprastāvādvarṇānāmuccāraṇā'bhāvātmaka iti labhyate. tathā ca "yasminvarṇe uccārite sati avyavahitāttarakāle varṇāntarāṇāmuccāraṇā'bhāvaḥ so'ntyavarṇo'vasānasaṃjñaka" ityarthaḥ phalati. tadabhipretya vyācaṣṭe--varṇānāmiti. yasminnuccārite sati varṇāntarāṇāmuccāraṇā'bhāvaḥ so'ntyavarṇo'vasānasaṃjñaka ityadyāhāreṇa vivaraṇaṃ yojyam. yadvā varṇānāmuccāraṇā'bhāvo virāmaḥ. bhāve ghañ. sa ca kiñcidvarṇoccāraṇottarakālika eva gṛhrate , vyākhyānāt. asmin pakṣe "kiñcidvarṇoccāraṇottaraṃ varṇāntarāṇāmuccāraṇābhāvo'vasāna"miti vivaraṇayojanā. tatra prathamapakṣe kharavasānayorityatra khari parato rephasya visargaḥ, avasāne tu "rephe sthāninī"ti yojyam. khapavasānayorityekāpi saptamī viṣayabhedādbhidyate. dvitīyapakṣe tu abhāvasyāpi buddhikṛtaṃ paratvaṃ bodhyam.

luk striyām. vihitasyeti. `pariśeṣitasya ve'ti bodhyam. etacca `āṅgirase'ityanuvṛttyā labhyate. yadyapi `vataṇḍālluk striyā'mityekasūtrakaraṇe'pi `āṅgirase'ityanivṛttyā anāṅgirase yañaṇorlugabhāvāt striyāmiṣṭaṃ siddyati, tathāpi puṃsyāṅgirase yañaṇorubhayoḥ prāptiraniṣṭeti tadvāraṇāya pṛthak sūtraṃ kṛtam. ṛṣitvāditi. na caivaṃ `ṛṣyandhake'tyaṇi siddhe śivādigaṇe vataṇḍapāṭho vyarthaṃ iti śaṅkyam. gargādipāṭhena yañā bādhāttannivṛttaye tatpāṭhasyāvaśyarakatvāta. ṣyaṅneti. `aṇiñoranārṣayo'riti sūtreṇeti bhāvaḥ.

virāmo'vasānam 27, 1.4.109 virāmo'vasānam. viramaṇaṃ virāmaḥ. bhāṃveghañ. śabdānusāsanaprastāvādāha-varṇānāmiti. saṃjñāpradeśāḥ-vāvasāne" ityādayaḥ. abhāvasyāpi buddhikṛtaṃ paurvāparyamastyeva, yathoccaritapradhvaṃsināṃ nityavibhūnāṃ vā varṇānām. yadvā viramyate'neneti virāmaḥ, bāhulakātkaraṇe ghañ. yaduccāraṇottaraṃ varṇāntaraṃ noccāryate so'ntyavarṇo'vasānasaṃjña ityarthaḥ. a()smastu pakṣe "kharavasānayoḥ" ityekāpi saptamī viṣayabhedādbhidyate-khari pare rephasya visargaḥ, avasāne ca rephe sthāninīti.